Waar da min bedde staat

In ne stal bie de koeien è 'k mijn bedde gemaakt
In stille staties, in tunnels van beton
Op zolders, in kelders of gewoon onder nen boom
De standaard voor kamers is lege gezakt

Maar in lutt'le second'n is mijn boelke gepakt
Mijn huisgerief, heel mijn hebben en mijn houden
En wat dat nog overschiet van mijn dromen
'k hechte mie nie met draadjes, 'k ben maar lichtjes geplakt.

't Afscheid doet ook zulk geen zeer meer
A' j' niets achterlaat
En niets dat u doet werekeren
't Leven zegt waarlangs da' j' gaat
Den dood gewoon wanneer
Min huis dat is waar da mijn bedde staat

Is 't er hier plekke? Waar stoor ik u nie?
Een kamer teveel? Of in den hof een kot?
Een pasterszaalke, of in 't huis van uwe God?
Een dak en wat water, 'k ben met weinig al blie

'k Kan nie veel betalen, maar 'k vergete u nie
Uw gulle offer, uw belangeloze bod
Hoe da je 't u aantrok, mijn schamel lot
'k Ga mijn kinders verhalen vertellen van gie

't Afscheid doet misschien wat zeer
Den dag da 'k u verlaat
En kan ik ooit nog werekeren?
't Leven zegt waarlangs da' j' gaat
Den dood gewoon wanneer
Mijn huis dat is waar da min bedde staat